“的确良”个回忆

前线

“的确良”个回忆

新民晚报新民网2021/08/22 14:11

文/许德华

小区里有只废旧衣服回收箱，有一日碰到开箱看到其中一件银灰色卡其风雪大衣有块绒线结个毛领头（防脏嗰），我认得个是老早流行个阿尔巴尼亚花；还有件有商店牌子个“的确良”衬衫白底粉红绣花，侪是老早时髦过个物事，有条棉花胎以前要棉花票买个也侪覅了。搿叫我想起老底子个辰光。

过去计划经济，买米凭粮票购粮证，儿子多个人家计划米不够吃就用大米调籼米可以多买几斤；做衣裳做被头个棉布要凭布票，为了省布票省钞票，姊妹兄弟多个人家只好“新阿大旧老二”每一件衣裳裤子侪要发挥作用。绸布店里有棉布方领衫、困裤短裤裁片，勿要布票，价钿便宜，我买过短裤裁片只要三角洋钿，自家动手缝起来就能穿。柜台里还有鞋滚条绣花线，有种一角钱一团个棉线卖得特别好，女生买回去钩包袋、钩窗帘、钩台布。埃歇辰光绒线衫大多自家编结，有勤快人坐公交车也会两根针穿来穿去结毛领头，我认得蛮多绒线花样。

的确良是化纤产品，勿需要布票，而且做出来个衣裳裤子相当挺括，卖相比纯棉布料好交关，就是价钿相对来讲高勿少。上世纪70年代初我读小学辰光，老师同学穿个还是传统棉布衣裤。有一天教音乐个沈老师穿仔一件雪雪白个短袖衬衫来上课，我就是搿辰光认得了“滴滴滑”个“的确良”。记得当天沈老师不当心让白衬衫沾上了红墨水，邪气心痛，董老师用棉花球擦也呒没弄干净。

后来穿的确良衣裳个人多了，我也有一件领头绣花个的确良衬衫。穿过以后发现搿种化纤布料也有缺点：一是穿辣身浪向“闷”，不像纯棉透气；二是淡颜色的确良衬衫拨雨淋湿以后会变得透明，穿出去勿雅观，后来改进过个“涤棉”就好交关。读初中辰光学堂安排参观同济大学，看到外国留学生大多穿“劳动布”衣裳，有同学讲外国人搭阿拉相反，伊拉侪欢喜纯棉嗰。

现在纯棉、纯麻、纯蚕丝个衣裳受欢迎，但是动手做衣裳个人少了，而且因为生活水平提高了，学会“断舍离”个人也多了，交关不想再穿个衣裳、过时个时装就拨送进了回收箱，有辰光小区回收箱拨塞得满出来！哎，搿也是垃圾分类环境保护个好现象。

admin

一代人的记忆

岗山文化

美好的回忆。当初“的确良”挺时兴的、

前线

岗山文化 发表于 2021-8-23 16:26
美好的回忆。当初“的确良”挺时兴的、

我一直以为是“的确凉”

admin